11 X 11
სპორტული პორტალი

INTERVIEW გიორგი მიქაუტაძესთან – ქართველი ფორვარდი, რომელმაც ბელგიის დაპყრობა დაიწყო

0

19 წლის ქართველმა ფორვარდმა გიორგი მიქაუტაძემ, გუშინ, 27 სექტემბერს, ბელგიის პროქსიმუს ლიგაში ჰეთ-თრიკი შეასრულა და მიმდინარე სეზონში უკვე 9 გოლი მოუგროვდა(5 მატჩში!!!)

 

11X11 Plus- საფრანგეთში, გიორგის ოჯახს დავუკავშირდით და რამდენიმე კითხვაზე გიორგის კომენტარიც მოვიპოვეთ.

 

აღსანიშნავია, რომ საფრანგეთში დაბადებული და გაზრდილი 19 წლის ბიჭი, კარგად საუბრობს ქართულად და ისტორიული სამშობლოსაგან კულტურულად მოწყვეტილი არაა, პირიქით.

 

“მე გიორგი მიქაუტაძე ვარ, დავიბადე 2000 წლის 31 ოქტომბერს, ქალაქ ლიონში. საფრანგეთის მოქალაქე ვარ. ოჯახში მე, მშობლები, უფრო და და უმცროსი ძმა ვართ. 7 წლამდე კლუბ “გერლანში” ვთამაშობდი.

 

8 წლის ვიყავი, როცა “ლიონში” 1-კვირიან სტაჟირებაზე მიმიწიეს, თუმცა დადებითი პასუხი ორ დღეში მივიღე და 7 წელი “ლიონის ოლიმპიკში” ვთამაშობდი. ამის შემდეგ “სენტ პრისტში” გადავედი და 17 წლამდე ამ გუნდის წევრი ვიყავი.

 

2017 წელს, 17 წლის ასაკში”მეცთან” 2-წლიან კონტრაქტს მოვაწერე ხელი, რომელიც 1-წლით გაგრძელდა, ხოლო 2019 წლის ბოლოს კლუბთან 3-წლიანი პროფესიონალური ხელშეკრულება გავაფორმე, რომელიც ძალაში 2020 წლის ივლისიდან შევიდა.

 

პროფესიონალური კონტრაქტის გაფორმებამდე საფრანგეთის ასაკობრივ ნაკრებში გამომიძახეს და იმედი მაქვს, კიდევ მიხმობენ.

 

შარშან ლიგა 1-ში დებიუტი “ნიცასთან” თამაშში მქონდა, 8 წუთი ვითამაშე. ხოლო “რენის”, “მარსელისა” და საფრანგეთის თასზე “დიჟონის” წინააღმდეგ სათადარიგოთა შორის ვიყავი.

 

საქართველოში რამდენჯერმე ვარ ნამყოფი, დიდი სანათესაო მყავს. უბრალოდ, ბოლო წლებში ვეღარ ვახერხებდი. ამა წლის ზაფხულს მქონდა დაგეგმილი ოჯახთან ერთად ჩამოსვლა, მაგრამ კორონავირუსის გამო გადაგვედო…

 

ძალიან მაგარი გრძნობაა საფრანგეთის ლიგა 1-ში თამაში. პირველ რიგში იმიტომ, რომ ხვდები, ოცნება აგისრულდა, მერე პროფესიონალურ კონტრაქტს მოაწერე ხელი და თან დებიუტი “ნიცასთან” მქონდა.

 

კლუბმა ბელგიაში 1 წლით გამანათხოვრა, თუმცა შესაძლოა, “მეცში” უფრო ადრეც დავბრუნდე. ძირითადში თამაშის შესაძლებლობა მექნება თუ არა, ეს უახლოეს მომავალში გამოჩნდება.

 

საქართველოს ნაკრებში თამაშზე ჯერ კონკრეტული არაფერია. ჯერ კარიერის საწყის ეტაპზე ვარ, ყველაფერი წინ მაქვს და თან, არავითარი შემოთავაზება არ მქონია.

არავინ იცის, რა მოხდება ხვალ, ამიტომაც მოვლენების გასწრება არ მსურს.

ქართველ ფეხბურთელებს პირადად არ ვიცნობ, მეგონა “გენტთან” თამაშისას გიორგი ჩაკვეტაძეს გავიცნობდი, თუმცა, სამწუხაროდ იმ მატჩში არ უთამაშია.

 

ვთვლი, რომ ყველა პროფესიონალი ფეხბურთელის უკან დიდი შრომა დევს, სხვანაირად ვერაფერს მიაღწევ. სწორედ ამიტომ, არა მხოლოდ გიორგის, არამედ ყველა ქართველ ფეხბურთელს საქართველოსა და ევროპაში წარმატებებსა და წინსვლას ვუსურვებ.

 

ძალიან დიდი მადლობა მინდა გადაგიხადოთ გულშემატკივრობისათვის. ეს ჩემთვის ძალიან მნიშვნელოვანია. ვამაყობ, რომ მთელი ჩემი ნათესავობა, ახლობლები და საქართველო გვერდით მიდგას.

სხვა სიახლეები

გააკეთე კომენტარი

თქვენი ელ.ფოსტის მისამართი არ იქნება საჯარო