11 X 11
სპორტული პორტალი

ვენეცკის 3 გოლი ევროპის თასზე

0 7

საქართველოს ნაკრების ხელბურთელმა, ქეთევან ვენეცკიმ წარმატებით დაიწყო სეზონი კოსოვოს ისტოგუში – ევროპის თასის მეორე შესარჩევი ეტაპის პირველ მატჩში ისტოგუმ 26-21 დაამარცხა ვუშტრია, ქართველმა კი 3 გოლი გაიტანა.

მეორე შესარჩევ რაუნდში ერთმანეთს კოსოვოს ორი კლუბი შეხვდა. საპასუხო მატჩი 17 ოქტომბერსაა ისტოგუს მოედანზე. ორი მატჩის ჯამში გამარჯვებული გავა მეთექვსმეტედფინალში, სადაც პირდაპირაა დაშვებული კიდევ ერთი ქართველის, მედეა ჩოხელის მაკედონიური კლუბი კუმანოვო.

ქეთევან ვენეცკი 22 წლისაა და ისტოგუში 2018 წელს გადავიდა თბილისის პეგასიდან. იმავე წელს კლუბმა ევროპის თასის წინამორბედის, ჩელენჯ კაპის პირველ რაუნდში დაამარცხა იტალიის კასანო მანიანო და მეთექვსმეტედფინალში გავიდა. ვენეცკიმ იტალიელებთან პირველ მატჩში 4 გოლი გაიტანა, მაგრამ მეორეში ჯვარედინი მყესები გაიწყვიტა და წელიწადზე მეტი მკურნალობდა, მისი კლუბი კი კოსოვოს ჩემპიონი გახდა.

ვენეცკი 2020 წლის გაზაფხულზე დაბრუნდა ისტოგუში, მაგრამ ჩემპიონატი ეპიდემიის გამო შეწყდა. ივნისში გათამაშდა კოსოვოს თასი, რომლის ფინალში ისტოგუ სწორედ ვუშტრიასთან დამარცხდა.

ისტოგუში, ვენეცკის გარდა, 3 უცხოელი ხელბურთელი თამაშობს, სამივე – მონტენეგროელი. ერთ-ერთი მათგანი, ესმა მურატოვიჩი გახდა დღევანდელი მატჩის ბომბარდირი 12 გოლით.

2020-21 სეზონის ევროტურნირებში 4 ქართველი ხელბურთელი თამაშობს. ჩემპიონთა ლიგაში წლეულს წარმომადგენლობა არ გვაქვს, ევროპის ლიგის ჯგუფურ ეტაპზე ითამაშებს გიორგი ცხოვრებაძის მონპელიე, ირაკლი ჩიქოვანის კონსტანცა კი ამავე ეტაპზე მოსახვედრად ბრძოლაში ლისაბონის სპორტინგთან დამარცხდა. ქალთა ევროპის თასზე საქართველოს ვენეცკი და ჩოხელი წარმოადგენენ.
geohandball.ge
სხვა სიახლეები

გააკეთე კომენტარი

თქვენი ელ.ფოსტის მისამართი არ იქნება საჯარო